الحمد لله جاء عنا مطعم ولا رانا متنا بالجوع ومعادش انجمو نستوعبو العلم لي يلقنولنا فيه الأساتذة جزاهم الله كل خير هههه
شبيك حتى هو الواحد يمشي الصباح يروح في الليل تقول خدام!!! وزيد الغلاء الموجود في الحوانت البرا أقل سندويتش ب-1500 م....
ربي يخلينا المطعم الجامعي لي ينوعلك ويشكلك في الماكلة ب-200 م فقط
الدولة معيشتنا في ترف منقطع النظير ربي يخلينا الدولة هههه توكل فينا وتشرب فينا وتقري فينا ...تقول واحد معرس بالدولة ..مرتك وما تعاملكش هكا :))
الطلبة تلقاهم محضبين قدام الراستو من 11 يستناو فيه بش يحل باش يهجمو (تي راي ماكلة تعشق حتى هي !!) هو يحل وهما يزدمو لڨيشيي ياخذو التوصيل
وينطلقو بعد للعذاب وين ترا العجب العجاب (ترى الشعب التونسي بنات ولاد يتحول إلى ننجا هههه) في صف حلزوني ما نحكيلكمش قداش فيه من دورة
يفصل بين كل دورة ودورة حديد والحمد لله جاء صف حلزوني كان جاء صف مستقيم نضمنلك يا سيادة القارء إلا ما تبدا شاد الصف من داركم ^_^
أنا أول مرة ندخلو على خاطر أول يوم ليا في الجامعة ومعايا زوز أولاد خبرة في المجال هذا حاصلوا
دخلنا مع بعضنا للصف ...هما فطرو وكملو وأنا مازلت شاد الصف !!! لحظات تحولو إلى ننجا من أول رون بوان في الصف نشوف فيهم تف تف تحت لحديد
جاو في الطليعة وأنا نغزر !!الحاصل كملت شديت الصف منيش عارف قاعد نقدم ولا ماشي ونرجع لتالي هههه ماو عمليات التسلل متواصلة بنات و ولاد
وفي هذا الصف العجيب ترى ناس أنواع وأشكال الحزين والفرحان وترا الساكت وترا لي ما يسكتش ولأغرب من هذا الكل انك ترى لي يقرا في الجامعة وترى لي مايقراش !!! ناس لا علاقة لها بالجامعة ولا بسلك التعليم تلقاهم في الصف (كما يقولوا الشعب يموت على بو بلاش ) تلقاهم كانوا في الحومة وما لقاو ما يعملوا والوقت وقت فطور يتلمو ويمشوا لراستو هههه
نواصلو المسير...الحمد لله وصلت بعد ما ضهري وجعني من الوقفة هزيت الطبق ووتعديت قدام اكة الوجوه البشوشة وين نجي قدام واحد يهز اكة المغرف ويحطلي شعندو وكان يلقى يعطيني ضربة بيه يدوخني ههه وجوه منرفزا وروحهم طالعة تقول إبليس واقف قدامهم ...هزيت البلاتو ودخلت وما عجبتنيش الماكلة خليتها وخرجت ومن وقتها ما عاودتش مشيت وليت نشجع في الشباب بش يرجع شوي لطفولتو ويهز معاه لمجة من المنزل وهو مرتاح ...
وأخر دعوانا ربي يخلينا الدولة ورئيسنا المبجل ليخم في مشاكل الشباب ويخاف على تغذيتهم وصحتهم..
