حبيت نعمل هالمداخلة الصغيرة قلت بلكشي نفيق شعب بلادي الحبيب على حقيقة يجهلها وحتى كان بش يعرفها ما
نتصورش بش تجيه غريبة ...
باش نسألكم يا ولاد بلادي .... ياخي ما فبالكمش إلي احنا في تونس عندنا وحدة من عجائب الدنيا السبع ؟!
إيييييييه نعم ومصنفينها الأولى زادة .
الأعجوبة هاذي إنجمو نسموها برشة أسامي كما تفاهة 7 ، اشهار 7 ،...ولا الاسم المتداول متاعها تونس 7
أنا إلي نعرفو إلي الاعلام هو المرآة إلي تعكس صورة البلاد إلي ينتميلها..وعلى هالحساب يا جماعة انجم نقلكم
إلي صورة بلادنا مشات تحت الساقين بعد لي القناة الوطنية الأولى متع بلادي البرمجة متاعها محصورة كان في الغناء ...
انا نعرف مهرجان قرطاج يتعمل مرة كل صيف ..تونس 7 كل يوم عندها مهرجان قرطاج وهوما من حفلة لحفلة وبين الحفلة والحفلة يجيبوا كيف كيف
حفلة هههه
وســــــــــــــاعة ساعة يجيبو برنامج تحت مسمى ديني وفي الغالب يكون بالجمعة وطل علينا عاد اكة المنشطة باللبسة الملتزمة متاعها
والحجاب فوق راسها وتبدى تسأل في الأسئلة الخطيرة متاعها لشيوخ ههه ماو احنا في تونس لازم نشركو المرأة في كل شي لا يقول علينا البرا
تونس دولة متخلفة...يا سيدي كرهتوني فيها المرأة .
ومع الثمانية متع الليل تجي معشوقة الجماهير " أخبار الثمنية " وحدث ولا حرج عاد ما نحبش نحكي عليها ياسر خاطركم لكل تعرفوها
حاصيلو كي تتفرج فيها ما تنجم تقول كان تونس بخير على ما يصورولك الدنيا وردية اللون *_^
والإدهى والأمر من هذا لكل إنو كي تجيك فاتورت الضو تلقى فيها معلوم مؤسسة الإذاعة والتلفزة التونسية وتخلص وفمك ساكت اللعب لا !
حبيت نسأل سؤال للقائمين على هالمهزلة 7 هذي ....ياخي ما تحشموش على رواحكم ؟! وفلوس الشعب ياخي وين ماشية ؟!
ما تقولوليش على البرامج و-..... خاطر ما رينا شي
هذا أنا انجم نسميه إستخفاف بعقل المشاهد التونسي ولا انجم نسميه زادة إحتيال على الشعب (سرقة ) وزوز صحاح
الى متى الاستخفاف بعقل المشاهد التونسي ..!!
نرجعو لحكايت هالأعجوبة...أنا نعرف إلي البلدان تفرح كي تبدا عندها حاجة كما هكا خاطر بش ادخللهم فلوس سياحة ....وتكون اكة الأعجوبة
نعمة على البلاد ...احنا هوني أعجوبتنا ما صارت على حد بالعكس تحولت إلى نقمة تثقل كاهل أولاد الشعب ولا ماو لاباس أنا نخلص في معلومها
وانا لفرجة ما نتفرجش فيها ....
الحاصل نعرف إلي أنا تو كمن ينبح بليل الشتاء البارد وكلامي موش بش يبدل شي ...أما موش المهم صوتك ...يوصل المهم تحكي
شو يا فينومان إنت وليد إرهابي تعمل الكيف وعندك خيوط مع القاعدة كان تعمل مزية على ولاد بلادك وتنسف مقر مؤسست التفاهة والسرقة التونسية وتو يتقيد اسمك في تاريخ
كبطل قومي ههههه
----------------------------------------
هذي كانت خاطرة من خواطر خوكم صمتي إن شاء الله تكون نالت رضاكم
ليست هناك تعليقات:
إرسال تعليق